عمان ...مسقط
سافرت عمان وباعتبرها من احلى البلاد اللي زورتها في حياتي لدرجة اني بافكر اعيش فيها جديا
من المعلومات المبهرة عن عمان :
1- إنها تمددت كبلد لدرجة أنها كانت بتحكم زانزبار ..أيوة زانزبار اللي ف افريقيا كانت تتبع حكم عمان وفضلت كده 200 سنة لحد ماالبرتغال قدرت تحارب عمان وتهزمها وتستعمر زانزبار وعمان مع بعض لمئات السنين برده. و ف النهاية قدرت عمان تحارب البرتغال وتهزمهم وتستقل. أد إيه دولة قوية مش كده؟؟؟ ولغاية النهاردة في عمانيين عايشين في زانزبار اتولدوا فيها وجنسيتهم عماني وبيتكلموا اللهجات المحلية ومابيتكلموش عربي ..وعادي جدا تقابل في عمان عمانيين ابوهم وامهم مولودين في افريقيا ( لأان اجدادهم سافروا وقت التمدد واستقروا هناك) وعاشوا هناك كل عمرهم. حقيقي شيء مبهر بالنسبة لي الخليط ده بين افريقيا والعرب
2- بسبب قربها من الهند وإيران جغرافيا تلاقي ده مأثر جدا على الأكل واللبس ..فيه ذوق راقي من التطريز والألوان وفيه توابل وأطعمة متأثرة بالمطبخين الفارسي والهندي بجانب المطبخ العربي.
3- البلد فيها كل حاجة لكل إنسان : بتحب البحر والاسترخاء؟؟؟ هاتلاقي احلى بحر واصفى مياه والجو الدافيء اللي بيوفرلك احلى لون لدرجة إني قعدت في البحر تلات ساعات متواصلة لأول مرة ف حياتي وماكنتش عاوزة أطلع بجد من حلاوة المية : حاجة كده خلطة بين ساخنة كأنك في جاكوزي وأمواج ناعمة تخليك متسلي وفيه أكشن وشايف درجات الأخضر والأزرق محيطة بيك تحس انك عايم في قوس قزح ..لا البحر في كل حتة بين جبال فاوانت بتعوم شايف جبال شامخة راسية
4- مغامر وتسلق جبال؟؟؟ لو عاوز جبال هاتلاقي جبال كتير بينهم الجبل ألأخضر وجبل شمس وده أعلى جبل في الجزيرة العربية ومايشمله من انشطة مشي بين الجبال و تسلق جبال ومعسكرات
5- الصحرا والسفاري؟: الصحرا هناك مالهاش اخر وتقدر تعمل سفاري وتخييم وشواء ومشاهدة نجوم
6- عاوز خضار وزرع: عندك الجبل الأخضر وكل الزرع اللي فوق..عندك وديان وغابات ومزارع ..الوديان احسن وقت لها الشتا والربيع عشان المطر بيكون ملاها مياه لدرجة انك تروح وادي تنزل المية تعوم كام متر وتطلع تلاقي نفسك في كهف تعدي منه وتنزل في مية تانية في وادي تاني وكل ده وانت محاط بزرع وورد وشجر ونخيل من كل شكل ولون وريحة ...حاجة ماتتحكيش ..تتعاش
7- بتحب الحيونات ؟؟: اختار باة مابين مشاهدة سلاحف في موسم وضع البيض--- رحلة مائية لمشاهدة الدلافين والحيتان وهي بتعوم وتنط وحركات اكروبات --- روح جزيرة من الجزر الكتير وشاهد الطيور وكل جزيرة لها انواع طيور غير التانية ---
8- بتحب الصيد ؟: عمان اصلا اقتصادها كان قائم على الصيد والتجارة وعشان كده الجزر هناك كلها اماكن مثالية للصيد زكل مكان فيه نوع سمك معين حسب ماتحب تصطاد. ومن أشهر السمك هناك التونة والهامور
9- بتحب المواقع الأثرية: مايفوتكش تزور القلاع والحصون التي بنيت قبل الاستعمار البرتغالي وأثنائه للدفاع عن البلد
9-احسن وقت لزيارة مسقط: من شهر سبتمير الى اخر ابريل ...لكن لو بتحب الحر يباة عادي روح بعد أبريل والحرارة ف الأربعينات ..بشكل عام الجو حار ورطب جدا في الصيف ورائع في الربيع والشتا. بالنسبة ل صلالة احسن وقت للزيارة يونيو ويوليو واغسطس
10
Comments
Post a Comment